السلام عليكم ورحمه الله وبركاته
أنا أول مرة أروح له ... كان مطعم كويس الحمدلله والاكل جيد ... بس مو هذا اللي شدني
إنما شدني وجود شاشة كأي المطاعم وحاطين على قناة العربية ... طبعا أظن إلى الآن شي عادي ... بس لما طلع برنامج إسمه أبناء الإسلام وتكلم عن المسلمين في ألمانيا الظاهر .... لأنه كان العنوان - على ما أظن - ألماني ....
طبعا تشوف الرؤوس تتلفت واللي كان بيطلع ووقف عند الباب يطالع و اللي رافع اللقمة يبغى ياكلها وخلاها معلقة .... المهم إنه لقى إهتمام البرنامج مع إنه مافي صوت !!! بس بحكم اللغة الأجنبية توجد ترجمة وهذا اللي نبغاه ... حبة حبة بدينا نتكلم عن البرنامج واسترسلنا في الموضوع هذا ودخلنا في مالكوم إكس و تاريخ "أمة الإسلام" الأمريكية اللي ظهرت على أيامه .... كلام دائما نخوض فيه بس الغريب إنه كل اللي في المطعم بدؤوا يتنقاشون عن الموضوع ... كان مجملاً عن صورة الإسلام بعد ١١ سبتمبر ... البرنامج حلو اللهم بدايته لك عليها شوي :) - غير البنت اللي تلعب boxing !!! - ... أنا تركت أخوياي يتكلمون شوية و قمت ألاحظ اللي جنبنا واللي ورانا واللي واقف ينتظر الطلب ... هذا يطرح رأي وهذا يرد وهذا ينكر وهذا يسلم للأمر الواقع !!!
الصراحة حسيت إني جالس بين مثقفين وفي ديرة مثقفة ومهتمة باللي يدور في العالم ... مو لازم يصير كلامي صحيح 100% بس على الأقل في تحسن ..... لو أول الكلام هذا كان تشوف واحد من الشباب يأِشر للعامل " غير للقناة الرياضية !!! " كعادة الوضع ....
لو في الإمكان وضع التلفزيونات في الأماكن العامة أو جعلها شرطا لكل مطعم مثلاً ونقل البرمج المهمة أو المفيدة أو حتى الوثائقية من خلالها كان يصير الوضع تماااام وأتوقع يقفز مستوى التفكير عند الشباب و من يرتاد هذه المناطق ....
كلام إيجابي بعد الموجه والـ"طحن " السلبي اللي لاحظته منتشر في الآونة الأخيرة ... يعني ليش ما عندنا وليش مو متوفر ذا و ليش هذا ما يسوي كذا وليش ذاك ما يسوي كذا P: .... مشوار الألف ميل يبدأ بخطوة .. خلصنا 100 خطوة وحتى مع تأخرنا 200 خطوة أخرى بس حنا أحسن من لديه العدة ليكمل الألف بتوفيق الله !!!
بالتوفيق للجميع
كلام جميل وأهم شي ما نكثر نقد لاننا مجتمع انتقادي ما ننظر للجانب الإيجابي..
ردحذفلو كان المقال بالفصحه كان افضل .. صحيح بالعامي اوصل للمعنى بالنسبه لنا.. بس لازم تتعود عالفصحه عشان تطور مهاراتك اللغويه اللي اشوف انها في تحسن كبير.
بالتوفيق يا مبدع
شيء جميل فعلًا ،،
ردحذفلكن أعتقد هالموضوع ماخذ حقه في وسائل إعلامنا ، فلذلك الشعب كله أصبح يمتلك ثقافة كهذه :) ..
هذا رأيي ؛)
الله يوفقك ... وقاعد أحاول والله وإن شاء الله ربي يوفقنا
ردحذفعزام: ممكن ... بس لو غيرت وسائل الإعلام الموضوع ؟؟ و لو صارت هذه الطريقة وسيلة من وسائل الإعلام المنتشرة ... أتوقع سيؤدي إلى إمتلاك الشعب ثقافة في المجالات المختلفة مو بس هذا المجال
تشرفت بمروركم
كلام يبرد القلب ..
ردحذفالحمدلله إنه فيه إهتمام ..
ويمكن مذبحة غزة الأخيرة أكبر دليل على إهتمام الناس ..
صالح السدوسي ..